БИШКЕК, 27-июн. — Sputnik. Россиядан алтын сатып алууга эмбарго киргизүү менен АКШ президенти Жо Байден экономиканы "бутка атып салгандай" эле болду. Мындай пикирин жергиликтүү экономист Питер Шифф билдиргенин РИА Новости жазды.
"Ак үйдүн башчысы мындай чечими менен Москвага чоң жакшылык жасады. Байден Путинге эмес, америкалыктарга сокку урду. Анткени бул жерде карапайым эл көбүрөөк чыгым болууда", — деди адис.
Ал эми мамлекеттик катчы Энтони Блинкен эгер G7 өлкөлөрү Россиянын алтынынан баш тартса, РФ жылына 19 миллиард долларга жакын каражаттан ажыраарын айтат. Ал бул нерсе Россияга эле көлөкөсүн түшүрөт деп эсептейт.
"Биз жарыялап жаткан демилге Россиянын энергетикадан кийинки экинчи эң кирешелүү экспортуна кесепетин тийгизет. Болжол менен 19 миллиард доллар кирешеден ажырап калуу оңой эмес", — деди Блинкен.
Ошол эле учурда Германиянын жарандары АКШлык экономист Питер Шиффтин пикирине кошулат. Die Welt гезитинин окурмандары калтырган комментарийлерге караганда, G7 биримдигинин алтынга карата эмбаргосу мунай эмбаргосундай эле натыйжа бериши мүмкүн.
Окурмандардын айтымында, Батыш лидерлери Москвага каршы санкциялык саясатын өжөрлүк менен улантууда, бирок алардын иш-аракеттери базар шартына туура келбей жатат. Анткени санкциялардан Европа менен Американын экономикасы көбүрөөк жапа чегүүдө.
Учурда G7 саммити өтүп жатат. Буга чейин АКШнын президенти Жо Байден G7 өлкөлөрү биргелешип Россиядан алтын импорттоого тыюу саларын бышыктаган. ЖМКлар белгилегендей, санкциялар чектөө киргизилгенден кийин казылып алынган ресурстарга карата колдонулат жана буга чейинки активдерге таасирин тийгизбейт.