БИШКЕК, 25-июн. — Sputnik. Мурдагы президент Алмазбек Атамбаевден ата-энем менен баламдын кунун кууп, өч алууну көздөбөй жакшы шарт түзүп бердим. Мындай пикирин президент Садыр Жапаров "Кабар" улуттук агенттигине берген маегинде билдирди.
"Бийликке келерим менен Алмазбек Шаршеновичке бардык шарттарды түзүп бергем. Мага чейин УКМКнын көчүк айланбаган тар камерасында жаткан. №47 колонияга котортуп, ээн-эркин басып турсун дегем. Бүгүнкү күнгө чейин каалагандай жашап келе жатат. Үй-бүлөсү, тааныш-билиштери, керек болсо, журналисттер кирип-чыгып жүрүшөт. "Таш менен урганды аш менен ур" деген бабалардын насаатын аткардым", — деди Жапаров.
Мамлекет башчы өзү камакта жаткан учурда мындай шарттын бири да болбогонун, катуу көзөмөлдө турганын айтты.
"Жакындарым менен бир айда эки жолу гана жолукчумун. Жаткан жеримди күн сайын тинтүү жүргүздүрүп турчу. Телефонумду күндүз катып, түнкүсүн колдончумун. Табиятыман өч алуу же кек сактоо деген сапатым жок. Кудайга койдум деп ичимден эле айтып коюп, баарын ошол замат унутуп коём. Болбосо өч алып, ата-энем менен баламдын кунун куусам болот эле. Менин жакындарымды жоготконума Атамбаев күнөөлүү деп айтпайм. Бирок себепчи болгон ушул киши да. 13 бир тууганды небере-чөбөрөлөрү менен камап, карыган атамдын өзүн таштап коюшуна себепкер болду", — деди президент.
Аны менен катар Жапаров атасы өлгөндө Атамбаев абактан чыгарбай койгонун, кийин энеси дүйнө салганда Сооронбай Жээнбеков топурак салууга мүмкүнчүлүк бергенин белгилеген.
"Ошондуктан Атамбаев тобоо деш керек. Бардык сот процесстери бүтсүн, анан чечим кабыл алабыз. Ал да Кудайдын бир макулугу, пендеси. Жаманбы-жакшыбы алты жыл эл башкарды. Өзү айткандай, бир жерин кысып тынч олтуруп турсун. Айтып койгула. Дагы адашып кетип үстөккө-босток кылмыш иштерин башына үйүп албасын", — деп эскертти Жапаров.