БИШКЕК, 25-июн. — Sputnik. Россия лидери Владимир Путин Беларусь президенти Александр Лукашенко менен болгон жолугушууда союздук мамлекеттердин коопсуздугун камсыздоо маселесинде тиешелүү деталдарды иштеп чыгууну эки өлкөнүн Башкы штабдары, коргонуу министрлерине тапшырууну сунуштады. Бул тууралуу РИА Новости жазды.
"Башкы штабдардын жетекчилерине, Коргонуу министрликтерине бул боюнча биргелешип иш алып барууга тапшырма берүүнү сунуш кылам", — деген Путин.
Лукашенко бул сунушка макул экендигин билдирген.
Коопсуздук демекчи, ушул эле жолугушууда Лукашенко Литванын Калининградды изоляция кылуу аракети согуш жарыялаганга тете экендигин айткан.
"Ошондой эле Литва акыркы учурда Россиядан Беларусь аркылуу Калининградга транзитти токтотуу ниети боюнча маалыматтар агымы улам өсүп бара жатат. Бул согуш жарыялаганга тете. Азыркы замандын шартында бул таптакыр туура эмес", — деген ал.
Эске салсак, Путин менен Лукашенко Санкт-Петербургда, Константиновск сарайында жолукту. Мурдараак алардын эки өлкөнүн өз ара мамилесин, интеграциялык маселелерди талкуулашары айтылган.