БИШКЕК, 25-июн. — Sputnik. Ош облусунун Жаңы-Кыштак айылында оодарылып кетип басып калып, алты кишинин өмүрүн алган HOWO автоунаасынын айдоочусу камакка алынды. Бул тууралуу Ош облустук ИИБдин маалымат кызматынан кабарлады.
Эске салсак, аталган трагедия 24-күнү эртең мененки саат 08.30 чамасында болгон. Андан алты киши көз жумган.
Облустук милиция окуянын чоо-жайын билдирди.
25 жаштагы Т. уулу Б. өзүнүн HOWO үлгүсүндөгү автоунаасы менен Кара-Суу районунун Жаңы-Кыштак айылы, тактап айтканда, Ош шаары менен чектешкен Касымбеков көчөсү аркылуу бара жатып кырсыктаган. Курулуш материалдарын сатуучу дүкөндүн тушуна келгенде, астынан кичи автобус чыга калып оң тарапка качкан, бирок рулду башкара албай жолдун четине оң капталы менен оодарылган. Жүктөп бара жаткан болжол менен 28 тонна көмүр төгүлүп, жолдун четинде тургандарды басып калган.
Милиция көз жумгандардын ким экендигин тизмектеди:
29 жаштагы А. У. Р. кызы, анын төрт жашар уулу, бир жаштагы кызы;
24 жаштагы кош бойлуу Н. О. Ж. жана анын 10 жаштагы кызы - Н. Р. А;
11 жаштагы кыз - О. Г. Х.
"Каза болгондордун сөөгүнө медициналык кароо жасалган. Айдоочу Ош облустук наркологиялык борбордон текшерилип, соо экени тастыкталган. Ал жана жанында кетип бара жаткан 20 жаштагы жүргүнчүсү Т. уулу А. да суралган", — деп айтылган маалыматта.
2022-жылдын 25-июнь күнү аталган факты боюнча Кылмыш-жаза кодексинин 312-беренеси менен иш козголуп, айдоочу Т. уулу Б. шектүү катары суралып, Кара-Суу РИИБдин убактылуу кармоочу жайына киргизилгени маалым болду.