БИШКЕК, 24-июн. — Sputnik. АКШнын президенти Жозеф Байден өзүн коомчулук алдында кантип алып жүрүүсү керектиги боюнча көрсөтмөлөр жазылган кагазды капысынан коомчулукка көрсөтүп алды. Бул тууралуу РИА Новости жазды.
Губернаторлор, профсоюз лидерлери жана жеке компаниялардын өкүлдөрү менен шамал энергетикасы боюнча жолугушууда тартылган сүрөттөрдө президент бир бетинде сөзүнүн тексти, экинчи бетинде эл алдына чыгуу боюнча көрсөтмөлөр жазылган кагазды кармап турганын көрүүгө болот.
"Сиз Рузвельт залына кирип, андагылар менен учурашасыз. Андан соң өз ордуңузга отурасыз. Журналисттер кирген соң, комментарий бересиз (эки мүнөт). ЖМК өкүлдөрү чыгат. Сиз AFL-CIOнун президенти Лиз Шулерге суроо бересиз. Эскертүү: Лиз жыйынга виртуалдык түрдө катышат. Катышуучуларга ыраазычылык билдиресиз. Андан кийин сыртка чыгасыз", — деп жазылган баракта.
Ак үйдөн ЖМКларга билдиришкендей, мындай көрсөтмөлөр кадимки көрүнүш болуп эсептелет.
Бул — саясатчылар жана мамлекеттик кызматкерлер коомдук иш-чараларда колдонгон стандарттуу көрсөтмөлөр. Мурдагы президент Барак Обаманын Ак үйдүн коомчулук менен байланыш бөлүмүнүн кызматкери Ханна Хэнкинс Fox News телеканалына берген маегинде Обама дагы дал ушундай көрсөтмөлөрдү колдонгонун билдирди.
Быйыл 80 жашка толгон Байден АКШнын тарыхындагы улгайган президент. Айрымдар аны акыл-эсинен тайып баратат деп сындашат.