БИШКЕК, 24-июн. — Sputnik. Бишкек мэри Эмилбек Абдыкадыров заманбап бийлер боюнча дүйнөлүк чемпионаттын тандоо турунун уюштуруучуларынын бири Жан Воинов менен жолугушту. Бул тууралуу муниципалитет билдирди.
Ошондой эле шаар жетекчиси менен жүз көрүшүүгө иш-чаранын чет элдик коноктору — чемпионаттын уюштуруучусу Канон Зузоа жана айтылуу ырчы Мадоннанын хореографы Марвин Гофин дагы келди.
Жолугушууда уюштуруучулар ири иш-чараны өткөрүүгө көрсөткөн жардамы үчүн мэрияга ыраазычылык билдиришти.
Белгилей кетсек, 25-июнда Бишкектеги соода борборлорунун биринде аталган сынактын тандоо түрү өтөт. Ага КМШ өлкөлөрүнөн келген бийчилер катышат. Иш-чаранын жыйынтыгы менен Парижде өтүүчү Modern Dance Championship - Fasion Concept фестивалында Кыргызстандын атынан чыга турган эки күчтүү бийчи аныкталат.