Акция 21-июнда саат 18:00дө Бишкектеги Дайыр Асанов атындагы "Жеңиш" паркында башталды. Ленинград блокадасынын эстелигинин алдына 3,5 миң шамдан турган инсталляция коюлду.
Ошондой эле ал жерде бир үзүм нан кармаган кыз, блокададагы Ленинграддын тургундарын өлкөгө алып келген поезд жана "Рахмат, Кыргызстан!" деген жазуу көрсөтүлдү. 3,5 миң шам Кыргызстанда өмүрү сакталып калган ленинграддык 3,5 миң балага арналган.
Мындан тышкары, акция 13 жашында "Ленинградды коргогондугу үчүн" медаль алган, Ленинград блокадасы боюнча кыргыз коомунун төрайымы Анна Кутановага арналды.
"Ал өмүр бою катаал күндөрдү эскерип, Кыргызстанга келип блокададан аман калгандарга кам көрүп жашаган", — деди "Жеңиш ыктыярчылары" кыймылынын координатору Анастасия Шевченко.
Эскерүү иш-чаралары "Жеңиш" аянтында жана башка бир катар конуштарда, анын ичинде Ош, Жалал-Абад, Кант, Чолпон-Ата шаарларында болот.
Акция Россия элчилигинин, Бишкектеги Россия үйүнүн, Ленинград блокадасы кыргыз коомунун жана "Жеңиш мурасы" фондунун колдоосу менен "Жеңиш ыктыярчылары" коомдук кыймылы тарабынан уюштурулду.