БИШКЕК, 21-июн. — Sputnik. "Улуу көчмөндөр мурасы" улуттук холдингинин башчысы Теңиз Бөлтүрүк "Учкундагы" офисинен башка кеңсеге көчөрдө министрлер кабинети же президент менен макулдашкан эмес. Бул тууралуу президенттин маалымат катчысы Эрбол Султанбаев билдирди.
Бөлтүрүк башка офиске көчкөн себебин "Улуу көчмөндөр мурасы" холдинги түзүлгөндүгүнө байланыштуу кызматкерлер эски кеңсеге батпай калгандыгы менен түшүндүргөн.
"Бир ай мурда бул окуя боюнча президент Жапаровдун тапшырмасы менен териштирүү жүрүп, Теңиз Бөлтүрүккө макулдашылбаган чечими үчүн эскертүү берилген", — деди Султанбаев.
Ошону менен бирге "Кумтөрдүн" гаражы жеке жактан Жогорку Кеңештин мурдагы гаражына которулган. Башкача айтканда, эми ижара акы мамлекетке түшүп турат.
"Азыркы офисте убактылуу иштешет. Анткени холдингге жаңы офис курууга Бишкектен жер берилди (борбордун түштүк тарабынан). Бир жылдын ичинде жаңы офисин куруп бүтүп, ал жакка көчүп кирүү тапшырмасы коюлду", — деди Султанбаев.
Эске салсак, ЖК депутаты Жеңишбек Токторбаев компания мамлекеттик кеңседен менчик имаратка кетип, ага 50 миң доллар ижара акысын төлөп жатканын билдирген. Бирок кийинки билдирүүсүндө 5000 чарчы метрлик аянттын ижара акысы айына 120 миң доллар болорун айткан.
Ал эми холдинг кеңсенин ижара акысы боюнча акыркы келишим түзүлө электигин, учурда эң арзан баада алуу боюнча сүйлөшүүлөр жүрүп жатканын билдирген. Ижарага берүүчү менен сүйлөшүүлөрдүн башында чарчы метр үчүн 17 доллар туурасында сөз болгону айтылган.