БИШКЕК, 21-июн. — Sputnik. Бириккен Араб Эмирлиги ЕАЭБ өлкөлөрү үчүн келечектүү өнөктөштөрдүн бири катары каралууда. Бул тууралуу Евразиялык экономикалык комиссиянын расмий өкүлү Ия Малкина Евразиялык өкмөттөр аралык кеңеш жыйынынын жыйынтыгы менен өткөрүлгөн видеокөпүрө маалында билдирди.
Ал сандарга көңүл бурган.
“Биздин мамлекеттер менен БАЭнин ортосундагы товар айлантуу былтыркы жылга караганда 61 пайызга жогорулап, 6,3 миллиард долларды түздү. Ал эми импорт 418 миллиондун тегерегинде, демек, экспорт импортко караганда басымдуулук кылууда. Бул келечеги кең рынок экенин түшүнүп жатабыз”, — деди Малкина.
Бүгүнкү жыйында өкмөт башчылар пайдалуу багыттарды аныктап, биримдикте өндүрүлгөн товарларды экспортко чыгаруу зарыл деген жыйынтыкка келишкен. Бул маселеде чечүүчү ролду ЕЭК ойномокчу.
Малкинанын айтымында, комиссия Египет, Индия, Иран сыяктуу мамлекеттер менен сүйлөшүүлөрдү улантып жатат.
Эскерте кетсек, бүгүн Минск шаарында Евразиялык өкмөттөр аралык кеңештин жыйыны болуп өттү. Ага ЕАЭБ мамлекеттеринин, байкоочу өлкөлөрдүн өкмөт башчылары жана ЕЭК коллегиясынын төрагасы катышты. Алар товарды идентификация каражаттары менен маркалоону ишке киргизүү, өнөр жай жаатында кооперация жана импортту алмаштыруу боюнча комиссия түзүү маселелери менен биргеликте керектөөчүлөрдүн укугун коргоо программасын талкуулашты.