БИШКЕК, 21-июн. — Sputnik. Евробиримдиктин Россия нефтисине киргизген жарым-жартылай эмбаргосунан улам бул жай дүйнөлүк рынок үчүн "болуп көрбөгөндөй оор болот". Мындай маалыматты РИА Новости Business Insider басылмасынын аналитиги Виктор Катонго шилтеме кылып таратты.
"Жакынкы арадагы түздөн-түз көзгө көрүнгөн майнап — жайдын катаал болушу", — деген Катон.
BI авторлору Москваны энергоресурстарды сатуудан түшкөн кирешеден ажыратуу күтүлгөн жыйынтыкты берген жок деп эсептешет.
"Тескерисинче болууда: Россия нефтини Украинадагы чатак башталганга чейинкиге караганда көбүрөөк экспорттоп жатат. Тездик менен өскөн баалардан улам өлкөгө чет элдик сатып алуучулардан болжол менен айына 20 миллиард доллардай акча түшүүдө", — деп жазган Business Insider.
Басылма суроо салган эксперттер "Россиянын сунушунун азайышы жана суроо-талаптын көбөйүшү пандемиядан кийин туристтик тармактын жанданышынын фонунда нефтинин баасын мындан ары да өстүрүшү мүмкүн" деп жооп беришкен.
Россия 24-февралда Украинага карата атайын операцияны баштаган соң ага жооп катары Батыш өлкөлөрү Москвага үстөккө-босток санкция салган. Бир катар өлкөлөр россиялык активдерди таптакыр жылдырбай токтотуп салды, бир топ бренддер өлкөдөн кетти. ЕБ санкциялардын алтынчы пакетин бекитти, тагыраагы, анда көмүр менен нефтинин импортуна акырындап эмбарго киргизүү айтылган.
Анткен менен санкция кээрин Батыш өзү да тартып, кесепети элди кыйнай баштады. Мисалы, электр энергиясы кымбаттап, инфляция өстү. Бул нерсе негизинен каржы секторуна жана жогорку технологиялык продуктуларды жеткирүүгө терс таасирин тийгизди.
Россиянын президенти Владимир Путин Россияны ооздуктоо жана алсыздандыруу саясаты миллиондогон адамдардын жашоосун начарлатып жатканын айтып келет.