БИШКЕК, 16-июн. — Sputnik. Жогорку Кеңештин депутаты Жеңишбек Токторбаев "Кумтөр голд компани" ишканасынын жетекчиси каражатты негизсиз чачып жатат деп айыптады.
Ал ишкананын жаңы кеңсеге көчүшүн сындап, 5000 чарчы метрлик аянттын ижара акысы айына 120 миң доллар болорун айтууда.
"Теңиз Бөлтүрүк өзүн хан сезип алды. Теңиз мырза, эсиңизге келиңиз, азырынча убакыт бар. Сизге элдин акчасын ары-бери чачууга ким укук берди? Эгер ушундайында токтобосоңуз, түрмөгө отуруп каласыз. Жакында холдингди талкалап Батышка качып кетесиз. Шаарда кеңсенин бир чарчы метри 20 доллар. 5000 миң чарчы метрге айына 100 миң доллар төлөйт да. Салык, коммуналдык кызматтарын кошкондо 120 миң долларга чыгууда. Муну сомго которсок 10 миллион, жылына 120 миллион сом төлөп жатпайбы", — деди Токторбаев.
Ошондой эле депутат 1,5 ай мурда Кумтөргө көчмө жыйын менен барганда көз айнек беришкенин айтып, аны президенттин жана министрлер кабинетинин парламенттеги өкүлү Алмасбек Токторбаевге берди. Көз айнекке дагы акча коротпосун деп Теңиз Бөлтүрүккө жеткирип беришин суранды.
Белгилей кетсек, эл өкүлү Жеңишбек Токторбаев кечээки жыйында дагы "Кумтөр голд компани" мамлекеттик кеңседен менчик имаратка кетип, ага ири суммада ижара төлөп жатканын айтып сындаган. Көп өтпөй ишкана буга жооп кайтарган.