БИШКЕК, 16-июн. — Sputnik. Сот Кыргызстандын мурдагы президенти Алмазбек Атамбаевди эки кылмыш иши боюнча актады.
Биринчи май райондук соту Калыс-Ордо конушундагы мектептин курулушу жана Түркиянын 10 жаранына мыйзамсыз паспорт берүү боюнча Атамбаевдин аракетинде кылмыштын курамы жок экенин аныктап, күнөөсүз деп тапкан.
Өкүмгө нааразы тарап 30 күндүн ичинде Бишкек шаардык сотуна даттана алат.
Маалыматка караганда, сотто жана тергөө маалында суракка алынган ыйгарым укуктуу органдардын кызматкерлери (жарандык берүү жагын караган) Атамбаевге каршы көрсөтмө берген эмес. Сот Атамбаев чет элдиктерге жарандык берүү маселеси каралып жатканда ортодо кандайдыр бир мыйзам бузуу бар экенинен кабары жок болгонун жана өзүнүн конституциялык укугунун негизинде тийиштүү жарлыкка кол койгонун аныктаган.
Мурдагы президенттин 2014-жылы Калыс-Ордо конушуна мектеп куруу үчүн жер аянтын аныктоодо дагы кызматтык абалын кыянаттык менен пайдаланганы аныкталган жок.
"Атамбаев өзүнүн Конституциялык ыйгарым укуктарын аша чаап колдонгон эмес жана ошол учурдагы мыйзамдарга каршы келген аракеттери аныкталган жок", — деди соттон.
Атамбаевдин башка кызмат адамдары менен кылмыштуу сүйлөшүүлөргө барганы дагы далилденген эмес. Ошондой эле мамлекеттик айыптоочулар менен жабырлануучу тараптар (министрлер кабинети менен мэрия) сотто Атамбаевди айыптоону улантуудан баш тартышкан.
Анткен менен Атамбаев абакта калтырылды. Саясатчы кримтөбөл Азиз Батукаевди мыйзамсыз бошотууга айыпталып 11 жыл 2 айга камакка алынган.