БИШКЕК, 14-июн. — Sputnik. Өткөн жылы орган алмаштырган 10 адам дары-дармектин жетишсиздигинен каза болгон. Бул тууралуу реципиенттердин өкүлү Диляра Утюшева билдирди.
Ал Sputnik Кыргызстан агенттигинин мультимедиалык маалымат борборунда өткөн "Органдары трансплантацияланган бейтаптар дарысыз калышы мүмкүн" аттуу брифингге катышты.
"Былтыр дары-дармектин жетишсиздигинен улам органын алмаштырган 15 адам кыйынчылыкка тушукту. Анын ону каза болуп, бешөө кайталап гемодиализге өткөн. Алар дагы бирөөнүн апасы, атасы, бир тууганы. Ар бирибиздин артыбызда мамлекет көңүл бурбаган донорлор турат. Ооругандардын орточо жашы 35-40тын тегереги. Алар эмгекке жарамдуу адамдар. Мамлекетке салык төлөйбүз. Анан эмне себептен зарыл болгон дарыларды талап кыла албайбыз?" — деди ал.
Утюшеванын айтымында, өткөн жылы керектүү дары-дармектерди сатып алуу боюнча тендер 8 айга кечиктирилип, эл өз акчасына сатып алууга аргасыз болгон.
"Бир адамга айына 100 доллардан 10 миң сомго чейин кетет. Айлык акы дары-дармекке гана сарпталат. Өлүмдүн статистикасы 16 пайызды түзөт", — деди Утюшева.
Ал кошумчалагандай, учурда Кыргызстанда жалпысынан 653 киши орган алмаштыруу боюнча кезекте турат. Негизинен булар бөйрөк (443 адам) жана боор (210) алмаштырчулар.
Таржымалы
Ички органдарды трансплантациялоодон кийин бейтаптар өлүп калбаш үчүн оригиналдуу дарыларды ичиши керек. Ошондуктан байтаптар Саламаттык сактоо министрлиги 2021-жылы дженериктерди (оригинал дары-дармектерди алмаштырчу препараттар) сатып алуу боюнча жарыялаган тендерди жокко чыгарып, оригиналдуу дары-дармектерди сатып алуусун талап кылышкан.
6-июнда Башкы прокуратура бул тендер мыйзамсыз өткөнүн айтып, министр Алымкадыр Бейшеналиевге кылмыш ишин козгогон. Эми бейтаптар дарысыз калышы мүмкүн болуп турат. Анткени алар өлкөдө сатылбайт, ал эми жеткирүүчүлөр тендерге катышуудан коркуп жатышат.