БИШКЕК, 13-июн. — Sputnik. Улуттук банктын экономика бөлүмүнүн башчысы Азат Козубеков жылдын аягына чейин Кыргызстанда кандай инфляция күтүлүп жатканын Sputnik Кыргызстан радиосунун эфиринде айтып берди.
Ал Улуттук банк адатта керектөө бааларынын жылдык өсүшүн 5-7 пайыз деңгээлинде кармап турууга аракет кылаарын билдирди.
© Sputnik / Асель Сыдыкова
"Үстүбүздөгү жылдын 20-майына карата Кыргызстанда инфляция 7,3 пайызды түздү. Бул биздин аймактагы өлкөлөрдүн ичинен эң төмөнкү көрсөткүчтөрдүн бири. Мисалы, Россияда 11 пайыздан, Казакстанда сегиз пайыздан ашык. Бизде орточо жылдык инфляцияны 13-14 пайыздын деңгээлинде болот деп күтүлүүдө. Башкача айтканда, жылдын аягына чейин баалар болжолдуу дал ушунча пайызга көтөрүлөт. Буга дүйнөдөгү экономикалык абал себеп болууда", — деди Козубеков.
Ал Улуттук банктын максаты — керектөө бааларынын өсүшүн белгилүү бир деңгээлде кармап туруу экенин белгиледи.
Козубековдун айтымында, акыркы 20 жылдын статистикасын ала турган болсок, Кыргызстан ЕАЭБ өлкөлөрүнүн ичинен инфляция эң жай өскөн өлкө болду.