БИШКЕК, 12-июн. — Sputnik. Окуучунун өлүмүн тергөөнүн алкагында "Ала-Тоо" аквапаркынын куткаруучусу кармалды. Бул тууралуу Башкы прокуратуранын маалымат катчысы Сирожиддин Камолдинов билдирди.
Баланын аквапаркта чөгүп кетүү фактысы боюнча милиция Кылмыш-жаза кодексинин 127 ("Этиятсыздыктан адам өлүмүнө алып келүү") жана 297-беренеси ("Керектөөчүлөр үчүн кооптуулук жаратуу") менен иш козгогон.
Маалымат катчынын айтымында, аталган кылмыш иши Башкы прокуратуранын көзөмөлүндө турат.
"Бишкектин Октябрь райондук прокуратурасынын көрсөтмөсү менен милиция кылмыш ишин козгоду. Аквапарктын куткаруучусу кармалды. Тергөө уланып жатат. "Ала-Тоо" аквапаркынын бардык кызмат адамдарынын аракеттерине юридикалык баа берилет", — деди Камолдинов.
Эске салсак, 6-июнь күнү Бишкектеги "Ала-Тоо" аквапаркында 3-класстын окуучусу сууга чөгүп каза болгон. Аталган окуяны териштирүү боюнча мэрия тарабынан комиссия түзүлгөн. Кырсыкка айыпталып № 95 мектептин алты мугалими жана башталгыч класстардын окуу бөлүмүнүн башчысы иштен бошотулган.
Аквапаркка жалпы жонунан башталгыч класстын 232 окуучусу барган. Аларды тогуз класс жетекчи жана тогуз ата-эне коштоп жүргөнү айтылган.
Бүгүн маркум окуучунун классташтарынын ата-энелери митингге чыгып, мектеп директору Айгүл Шимованы, аквапарктын жетекчилигин кылмыш жоопкерчилигине тартууну талап кылышты.