БИШКЕК, 11-июн. – Sputnik. Атырау облусунун полиция кызматкерлери Кыргызстандын бир нече жыл мурда жоголгон жаранын жакындарына таап берди. Бул туурасында аталган аймактын полиция департаментинин маалымат кызматы социалдык тармактагы баракчасы аркылуу кабарлаган.
"2011-жылы эки кыргызстандык жаран (аял кишилер) Атырауга кийим-кечек сатканы келген. Ошол эле жылы бир туугандардын бири мекенине кайтып, экинчиси аталган шаарда калган", – деп айтылат маалыматта.
2013-жылы акыркы ирет телефондон сүйлөшүп, ошол боюнча байланыш үзүлгөн. Аталган факт боюнча Атырау облусунун Полиция департаментинин жетекчиси түзгөн издөө тобу аялды издеп баштаган.
"Көрсө, аял жакындарына таарынып, алар менен байланышты ушундай жол менен үзүүнү чечкен. Туугандары өз алдынча издеп жыйынтык чыккан эмес", — деп билдирген полиция.
Тартип сакчылары бир туугандар жолуккан кадрларды жарыялады.
Табылган аял Кыргызстандын Акматова Жазгүл Козубаевна аттуу жараны экенин айткан. Ал эми башка бир аял бир тууганын он жылдан бери издегенин жана аны таап берген полиция кызматкерлерине ыраазылыгын билдиргенин видеодон угууга болот.