БИШКЕК, 10-июн. — Sputnik. № 95 мектептин директору Айгүл Шимованы иштен кетирүү боюнча комиссиянын чечими бар. Бул тууралуу Бишкектин вице-мэри Виктория Мозгачева шаардык кеңештин бүгүнкү жыйынында билдирди.
Жыйында аталган мектептин директору "Ала-Тоо" аквапаркында каза болгон окуучу бала тууралуу доклад жасап, мындай массалык иш-чара уюштурулганы тууралуу билбей калганын жана окуучулардын мектептен автобус менен кеткенин көрбөгөнүн белгилеген.
"Сиз көрбөй, билбей калганыңызды айтып жатасыз. Демек, иштебейт экенсиз да. Ар бир баладан 750 сомдон чогултулган. Бул чоң сумма. Ошол күнү 250 сомго арзандатуу болгон экен. Калган акчаны бөлүшүп алсаңар керек. Мындан кабарыңыз барбы? Эгер жок болсо, анда иштебей эле жүрөсүз. Директор болуп отурууга моралдык укугуңуз жок", — деди шаардык кеңештин депутаты Элизавета Алымбаева.
Ал эми мектеп директору балдар канчадан чогултканы боюнча дагы кабары жок болгонун билдирди.
Шаардык кеңештин депутаты Жаныбек Асанбеков "директорду иштен алууга мүмкүнбү?" деген суроо узатканда Мозгачева бул боюнча комиссиянын чечими бар экенин билдирди.
"Демек, иштен алат экенсиңер да?" — деп тактады Асанбеков.
Вице-мэр "ооба" деп жооп берди. Ал ошондой эле мектеп окуучуларына эс алуу уюштурган башталгыч класстардын алты мугалими жана эки окуу бөлүм башчысы иштен кеткенин кошумчалады.
Эске салсак, 6-июнь күнү Бишкектеги "Ала-Тоо" аквапаркында 3-класстын окуучусу сууга чөгүп каза болгон. Аталган окуяны териштирүү боюнча комиссия түзүлгөн. Милиция Кылмыш-жаза кодексинин 127 ("Этиятсыздыктан адам өлүмүнө алып келүү") жана 297-беренеси ("Керектөөчүлөр үчүн кооптуулук жаратуу") боюнча иш козгогон.
Аквапаркка жалпы жонунан башталгыч класстын 232 окуучусу барган. Аларды тогуз класс жетекчи жана тогуз ата-эне коштоп жүргөн.