Жылына 2000дей адам күйүктөн жабыркап ооруканага кайрылат. Алардын көбү термикалык күйүккө кабылгандар. Бул тууралуу Темир Турсалиев Sputnik Кыргызстан радиосунда маек куруп жатып билдирди.
Анын айтымында, оттон, химиялык уулуу заттардан, чагылгандан күйүп калган учурлар аз кездешет.
"Күйүктүн адамдын саламаттыгына зыян келтирчү кесепети көп. Мисалы, катуу күйгөн кишинин өпкөсү, бөйрөгү, ашказан менен ичеги-карды жабыркайт, канаганга чейин барат. Күйүк учурунда организмден суюктук көп кетет, мындан улам кан коюуланып, оор жагдай жаралат. Ооруну басаңдатуу максатында туура эмес ыкмаларды колдонуп, дартты күчөтүп жиберген учурлар көп. Тиш пастасын, томат пастасын, турдүү майларды колдонуп ысыкты басышат. Бирок ал дарыгерлерге эле тоскоолдук жаратып, күйүктүн деңгээлин аныктоого терс таасирин берет. Алгач кийимди тез чечип жиберип, жараны муздатууга аракет көрүү керек. Эң жөнөкөй жолу муздак суу колдонуу зарыл. Жылына 2 000дей адам күйүктөн жабыркап ооруканага кайрылат. Алардын көбүн өспүрүм курактагы балдар түзөт",— деди Турсалиев.
Ошондой эле адис комбустиологдорду даярдоого көңүл буруп, ата-энелер балдары үчүн жоопкерчилик алышы керектигин кошумчалады.