БИШКЕК, 7-июн. — Sputnik. Россиянын Тышкы иштер министрлиги Евробиримдик жетекчилигинин билдирүүлөрүнө жооп кайтарды.
Еврокомиссиянын төрайымы Урсула фон дер Ляйен 24-майда Давостогу Дүйнөлүк экономикалык форумдун сессиясында Москва Батыштын санкцияларына жооп иретинде дан эгиндери менен жер семирткичтерди куралга айландырып жатканын айткан.
Россиянын Тышкы иштер министрлигинин жообу:
Россия дүйнөлүк азык-түлүк рыногунун жоопкерчиликтүү өкүлү катары айыл чарба продукциясын, жер семирткичтерди, энергия булактарын жана башка маанилүү продукцияларды экспортко чыгаруу боюнча милдеттенмелерин мындан ары да абийирдүү аткарууга ниеттенет;
Россия кризис болуп жатканына тынчсызданат. Ошондой эле Азиянын, Африканын, Латын Америкасынын жана Жакынкы Чыгыштын өнүгүшү үчүн социалдык маанилүү товарларды кечиктирбей берүү маанилүү экенин жакшы түшүнөт;
Россияда быйыл буудай жакшы түшүм берери күтүлүүдө, бул 1-августтан тарта 25 миллион тонна дан экспорттоого мүмкүндүк берет;
2022-жылдын июнунан декабрына чейин 22 миллион тонна жер семирткич экспорттой алат (бул мезгилдеги дүйнөлүк керектөөнүн 20 пайызы);
атайын операция башталгандан кийин Россия муктаж болгон өлкөлөргө гуманитардык жардам көрсөтүүнү улантты;
Брюссель киргизген санкциялык режим жер семирткичтерди жана агроөнөр жай продукциясын өндүрүү жана ЕБге гана эмес, үчүнчү өлкөлөргө да экспорттоо мүмкүнчүлүгүн чектейт;
Европа биримдиги тарабынан Крым менен Севастополдун экономикалык блокадасы глобалдык азык-түлүк коопсуздугуна терс таасирин тийгизген кошумча фактор болуп саналат;
Евробиримдик айрым үчүнчү өлкөлөрдү Батыштын антироссиялык курсун колдоого көндүрүү үчүн глобалдык азык-түлүк коопсуздугу жаатындагы кырдаалдын начарлашы үчүн Москванын "жоопкерчилиги" темасын ачык колдонууда.