Балдарды интернеттен коргоо азыркы күндүн актуалдуу темасы болуп, дайыма бул жаатта чара көрүлүп турушу керек. Анткени дүйнө жүзүндө интернет-колдонуучулардын 30 пайызы балдар. 2021-жылы "Кыргыз интернет коому" Кыргызстандын аймагындагы 500 сайтка изилдөө жүргүзгөн. Ошонун арасынан бир гана сайт балдардын жеке маалыматтарын интернетте коргоо тууралуу маалымат менен камсыздайт экен. Бул тууралуу Ажыбек Нурланов Sputnik Кыргызстан радиосунда маек куруп жатып билдирди.
Анын айтымында, Кыргызстанда балдарды интернеттен коргоо багытында маалыматтар абдан аз.
"Дүйнө жүзүндө 21 гана мамлекетте балдардардын интернеттеги коопсуздугу камсыздалып, аларды коргоо жаатында мыйзамдар иштелип чыккан. Менин билишимче, 2021-жылы Жогорку Кеңеште балдардын интернеттеги коопсуздугун камсыздоо боюнча мыйзам иштеп чыгуу маселеси көтөрүлгөн. Бирок азырынча мыйзам кабыл алынганын укканым жок. Мыйзам кабыл алынышы керек. 2021 жылы 14-сентябрда президент Садыр Жапаровдун министрлер кабинети жөнүндөгү жарлыгына өзгөртүү киргизилип, жеке маалыматтарды коргоо агенттиги түзүлдү. Бирок бул абалды бир гана мамлекет, атайын агенттиктер көзөмөлдөбөйт. Онлайн-коркунучтардан баланы эң башкысы ата-энелер, мугалимдер коргоосу зарыл. Эгерде коом санариптик сабаттуулугун, көндүмдөрүн жогорулатса, ар кандай маалымат, тиркемелерди иргеп, балдарды интернеттеги коркунучтардан коргоп алсак болот. Балдардын интернетке кирүүсүнө, аны колдонууга таптакыр тыюу салуудан алысмын. Болгону алардын коопсуздугун камсыздап, керектүү, пайдалуу гана жактарын алууга шарт түзүү керек. Себеби учурда интернет өспүрүмдөргө жакшы мүмкүнчүлүктү ачып жатат", — деди Нурланов.
Адис Кыргызстан калкынын саны 6,5 миллиондой болсо, колдонгон гаджеттеринин саны тогуз миллион экенин, алардын 85 пайызы керексиз, утурумдук контент көрөрүн кошумчалады.