БИШКЕК, 6-июн. — Sputnik. Шанхай кызматташтык уюму (ШКУ) Казакстандагы референдумду ачык, таза өттү деп тапты. Бул тууралуу уюмдун башкы катчысы Чжан Мин билдиргенин Sputnik Казакстан жазды.
"Миссия тарабынан референдумдун легитимдүүлүгүнөн шек туудурган улуттук мыйзамдардын нормаларын бузган учурлар катталган жок. ШКУ референдумду ачык, таза жана демократиялык жол менен өттү деп эсептейт", — деген Мин.
Анын айтымында, Казакстан референдум өткөрүү үчүн бардык шартты түзгөн.
ШКУнун байкоочулар миссиясы Казакстандын Тышкы иштер министрлигинин чакыруусу менен өлкөдө 3-июндан 5-июнга чейин иштеген. Миссиянын курамына ШКУ өлкөлөрүнүн аткаруу жана мыйзам чыгаруу органдарынан 17 байкоочу кирген.
Расмий маалыматтарга караганда, жалпы жонунан 8 миллион 30 миң 739 киши бюллетень алган, бул добуш берчүлөрдүн тизмесине кирген казакстандыктардын 68,44 пайызын түздү. Ал эми добуш берүү укугуна 11 миллион 732 миң 699 адам ээ болгон.
Эскерте кетсек, Казакстанда кечээ, 5-июнда, Конституцияга өзгөртүү киргизүү боюнча референдум болгон. Президент Касым-Жоомарт Токаев бул өзгөрүүлөр башкаруунун "суперпрезиденттик" формасынан баш тартып, таасирдүү парламенти жана өкмөтү бар президенттик башкарууга жол ачышы керектигин белгилеген.