БИШКЕК, 5-июн. — Sputnik. Нарын облусунун Ат-Башы районунда өндүрүлгөн балык продукциясы жакында башка мамлекеттерге экспортко чыгарылары күтүлүүдө. Бул тууралуу президенттин Нарын облусундагы ыйгарым укуктуу өкүлчүлүгү билдирди.
Ага ылайык, аталган райондо айыл чарба семинары болгон. Анда Ат-Башы районунун акими Эмилбек Абдыкадыров райондо беш балык чарбасы бар экенин айтып, алардын ичинен эң көлөмдүүсү Калинин айылындагысы экенин белгилеген.
"Жакында бул жерде балыкты тоңдуруп, экспортко чыгара турган ишкана ишке кирет. Райондогу балык чарбасынын логистикасы ушул айылда түзүлүп жатат. Мындан сырткары, быйыл дагы төрт балык чарбасын ишке киргизүү үчүн долбоорлор даярдалууда", — деген Абдыкадыров.
Калинин айылындагы балык чарбадан айыл өкмөттүн бюджетине жылына 50 миң сом каражат түшөрү айтылып, элге ар кандай социалдык колдоолор көрсөтүлүп турары кошумчаланды.
