БИШКЕК, 4-июн. — Sputnik. Нарын шаарынын орто мектептеринин бүтүрүүчүлөрү аталган калаадагы аз камсыз болгон үй-бүлөлөргө турак үйлөрдү белек кылышты. Бул тууралуу аймактык кабарчы билдирди.
"Бүгүн, 4-июнда, Нарын шаарында жакшы саамалык болуп, калаадагы орто мектептерди 2012-жылы бүтүргөндөр аз камсыз болгон беш бүлөгө, ал эми 1977, 1998, 1994-жылы аяктагандар төрт бүлөгө, жалпысынан тогуз үй-бүлөгө турак үйлөрдүн ачкычын тапшырышты", — деп билдирди.
Үйлөрдүн ачкычтарын жаңы кожоюндарына тапшыруу аземи шаардык "Ала-Тоо" стадионунда өткөрүлгөн.
Облус жетекчиси Сабыркул Ашимбаев айкөлдүк менен сооп иш жасап жаткан жаштардын ынтымагына Нарын облусунун элинин жана өзүнүн атынан терең ыраазычылык билдирип, демилгелүү муундардын өкүлдөрүнө жакшы тилегин жолдоп, ыраазычылык каттарды тапшырган.
Аймактык кабарчы өткөн жылы дагы көзү азиз шаар тургунуна бүтүрүүчүлөр үй алып беришкенин кошумчалады.