БИШКЕК, 4-июн. — Sputnik. Дүйнөнүн 28 мамлекетинде маймыл чечегин жуктурган 800 учур катталганын АКШнын Ооруну көзөмөлдөө жана алдын алуу боюнча (CDC) борборунан кабарлашкан.
Борбордун сайтында интерактивдүү карта жайгаштырылып, анын негизинде оорунун дүйнө боюнча тараган жерлери расмий көрсөтүлгөн.
Андагы маалыматтарга таянсак, 28 мамлекеттен 790 учур катталган. Илдетке чалдыккандардын эң көбү Улуу Британияда (207 бейтап), Испанияда (156) жана Португалияда (138) экени маалым болду. АКШ сегизинчи орунда (20) болсо, анын алдына Канада, Германия, Нидерланд жана Франция чыккан.
Дүйнөдө маймыл чечегинен адам көз жумган учур Нигерияда катталган.
Маймыл чечеги – сейрек кездешүүчү вирустук инфекция, ал адамдарга да жугушу мүмкүн. Бул, адатта, жеңил оору болуп саналат жана жуктуруп алгандардын көбү бир нече жуманын ичинде айыгып кетишет. Бирок кээ бири кыйналышы мүмкүн. Адистер маймыл чечегин жыныстык жол менен жугуучу инфекция деп эсептебейт. Анткен менен оорулуу адам менен жакын байланышта болгондор жугузуп алышы мүмкүн. Оорунун алгачкы белгилерине ысытма, баш оору, булчуңдардын оорушу, белдин оорушу, лимфа бездеринин шишип кетиши, чыйрыгуу жана чарчоо кирет. Көбүнчө беттен башталып, дененин башка бөлүктөрүнө исиркектер чыгат.