БИШКЕК, 3-июн. — Sputnik. "Инвитро-Урал" лабораториясынын балдардын ден соолугу боюнча эксперти Алена Михайлова бөбөктөргө электрондук гаджет көргөзүү анын ден соолугуна гана эмес психологиясына, өсүүсүнө канчалык таасир этерин РИА Новостиге айтты.
"Балага 3 жашка чейин таптакыр гаджет карматпаш керек. Андагы өтө ачык, жарык, кыймылдаган картиналар көрүүсүн бузат. Ошондой эле жакшы калыптана элек нерв системасына күч келтирет", — деген адис.
Анын айтымында, бөбөк бул куракта дүйнө таанып, баарын колу менен кармап, жыттап, даамын сезип көрүшү керек. Ал эми гаджет мунун баарына тоскоолдук кылып, баланын өнүгүшүнө бөгөт болот. Михайлова алгачкы үч жыл баланын өнүгүшүнө, өзгөчө тилинин чыгышына өтө маанилүү убакыт экенин белгилеген.
"Баланын тили эмоционалдык карым-катыш, жакындары менен баарлашуудан чыгат. Эгер балага 3 жашка чейин эле телефон карматып койсо, бул процесс токтоп же жайлап калышы ыктымал. Бул куракта баланын мээси да тез өсүп, чыгармачыл мүмкүнчүлүктөрү, интеллектуалдык деңгээли жогорулайт. Гаджет буларга жолтоо гана болот", — деген Михайлова.
3 жашка чейин телефон, гаджет көп көргөн бала кийин мектеп курагында маалыматты тез кабыл ала албай кыйналып калары айтылды.
"Бала уккан текстин эсине жакшы сактай албай, тексттин маанисин түшүнбөй кыйналат. Окууда да көйгөй жаралып, китеп окуу ага кызыксыз болуп калат", — деген Михайлова.
Гаджетти өтө көп колдонгон бөбөк кийин коомго да аралаша албай, реалдуу жашоодон алыстап калары кошумчаланган.