БИШКЕК, 2-июн. — Sputnik. Кыргызстандан аткезчилик жолу менен миңдеген тонна минералдык жер семирткич жана тамак-аш чыгып кетип жаткан. Ага бөгөт коюуга аракет болуп жатканда депутат Адахан Мадумаров УКМК кызматкерлеринин ишине тоскоолдук кылып, стационардык постторго барып, видео тартып жатат. Бул тууралуу парламентте УКМК төрагасы Камчыбек Ташиев айтты.
Буга чейин ал ушул эле трибунада Мадумаров аткезчилерге "крыша" болуп жаткандыгы тууралуу далили бар экенин билдирген.
"Мадумаров биздин кызматкерлерди видеого тартып, отчёт алууга аракет кылган. Алар видеого түшпөй басып кетсе, качып кетти деп жатат. Алар качкан жок. Муну менен жаакташып, талашып-тартышып отурбай туура эле кетип калышкан. Анткени биздин кызматкерлердин ишин бир гана прокуратура органдары көзөмөлдөй алат. Депутаттын буга мыйзам боюнча укугу жок", — деди УКМК төрагасы.
Ошондой эле ал Мадумаров тарткан видеодо УКМК кызматкерлери пара алып жатат деп сүйлөп берген кишилердин туугандары өздөрү аткезчилик менен алектенгендер экенин кошумчалады.
Андан соң Адахан Мадумаров төрагага кайрылып, сөз берүүсүн өтүндү. Бирок жалпы добуш менен анын суранычы канааттандырылган жок.
"Мейли бербей койдуңар. Ошондо Камчынын кыйкырган, жалаа жапкан сөздөрү калат дагы, Мадумаровдун үнү угулбай калабы?" — деди депутат.
Ташиев ага дароо жооп кайтарды.
"Аз сүйлөш керек, тилим бар деп эле сүйлөй бербей. Колуңду кезебе, сындырып коём. Дагы жакшы, өткөндө депутаттар макулдугун бербей, камалбай калдың. Мен прокурор болгондо эчак камалмаксың, азыр да кеч эмес. Булар мамлекетте чоң тополоң уюштуруп, бийликти алууга аракет кылып жатышат. Жакындары Адахан аке бийликке келет деп сүйлөп отургандары боюнча ыкчам иштер жүргүзүлүүдө. Жакында бир тууганыңды камасак, дагы кыйкырып чыгасың", — деди ал.
Ал эми Мадумаров төрагага кайрылып, Ташиевдин микрофону тынымсыз иштеп жатканына нааразы болду.
"Мени баарына "крыша" болду деп айыптап жатасыңар. "Крыша" болуп жаткандарды четинен камагыла", — деди Мадумаров.
Мындан соң Ташиев Мадумаровдун жакында камаларын айтса, депутат "колуңдан келбейт" деп жооп берди.