БИШКЕК, 30-май — Sputnik. Дүйнөдө маймыл чечегинен адам көз жумган учур Нигерияда катталды. Бул туурасында РИА Новости жазды.
Маалыматта аталган өлкөдө бул илдет менен 21 кишинин ооруп жатканы айылган, ал эми өлүм катталган учур туурасында Оорунун алдын алуу жана көзөмөлдөө борбору (NCDC) билдирген.
Нигерия калкы 210 миллион адамдан арбыныраак. Бул Африкадагы өлкөлөрдүн ичинен ирилерине кирет, ал эми дүйнөдө калкынын саны боюнча алтынчы орунда турат.
"2022-жылдын 29-майына карата оорунун 21 учуру катталса, алардын ичинен бирөө көз жумду. 40 жаштагы бейтаптын башка илдеттери да козголгон", — деп айтылган маалыматта.
Соңку маалыматтарга таянсак, оору Нигериянын Адамава, Лагос, Байелса, Дельта, Кросс Ривер, Абуджи, Кано, Имо, Риверс аймактарында катталган.
NCDC өлкөдө маймыл чечегине каршы күрөшүү боюнча тармактар аралык борбор өзүнүн ишин баштагандыгын билдирген.
Маймыл чечеги менен адамдын ооруп калган биринчи учуру 1970-жылы катталган. Бул диагноз кийин да адамдарга коюлуп, алар Африкадан табылган. Медиктердин айтымында, ал жаныбардан адамга жуккан.
"Акыркы мезгилдери дарыгерлер Европанын бир катар өлкөлөрүндө, Америкада, Австралияда бир топ учурларын кезиктирген. Ошондой болсо да адистер инфекциянын таралуу жолдорун так аныктай албай келишет", — деп жазды РИА Новости.
Маймыл чечеги – сейрек кездешүүчү вирустук инфекция, ал адамдарга да жугушу мүмкүн. Бул, адатта, жеңил оору болуп саналат жана жуктуруп алган адамдардын көбү бир нече жуманын ичинде айыгып кетишет. Бирок кээ бири кыйналышы мүмкүн. Адистер маймыл чечегин жыныстык жол менен жугуучу инфекция деп эсептебейт. Анткен менен оорулуу адам менен жакын байланышта болгондор жугузуп алышы мүмкүн. Оорунун алгачкы белгилерине ысытма, баш оору, булчуңдардын оорушу, белдин оорушу, лимфа бездеринин шишип кетиши, чыйрыгуу жана чарчоо кирет. Көбүнчө беттен башталып, дененин башка бөлүктөрүнө исиркектер чыгат.