БИШКЕК, 28-май — Sputnik. Мурдагы президент Алмазбек Атамбаев Улуттук кардиология борборунан жеке менчик клиникага которулган жок. Бул тууралуу Sputnik Кыргызстан агенттигине анын жактоочусу Замир Жоошев билдирди.
Буга чейин айрым ЖМКлар Атамбаевдин менчик клиникага которулганын жазып чыгышкан. Ошондой эле социалдык тармакка анын менчик медициналык клиниканын алдында турган сүрөттөрү чыккан.
25-майда мурдагы президент Алмазбек Атамбаевдин ден соолугу начарлаганына байланыштуу Мирсаид Миррахимов атындагы Улуттук кардиология жана терапия борборуна жаткырылганы айтылган.
"Атамбаев Улуттук кардиология борборунан башка жакка которулган жок. Болгону аны МРТга тарттыруу үчүн менчик медициналык клиникалардын бирине кыска убакытка алып барышкан. Себеби Кардиология борборунда тиешелүү жабдуу болгон эмес", — деди жактоочу.
Эскерте кетсек, Алмазбек Атамбаев буга чейин башка адистерди тартууну талап кылып, абактагы ооруканада кароодон өтпөй койгон. Ден соолугу начарлаганын айтып сот жараянына катышуудан да баш тарткан. Аны мажбурлап алып келгенде чуу салып, бир нече ирет залдан кайра чыгарылган.
Саясатчы Молдовановка айылындагы №27 түзөтүү колониясында болчу. Ага чейин Бишкектеги №47 абактын ооруканасына жатып чыккан.