БИШКЕК, 27-май — Sputnik. Кыргызстанда россиялык телеканалдар өчүрүлгөн жок. Бул тууралуу маданият, маалымат, спорт жана жаштар саясаты министринин орун басары Чыңгыз Эсенгул уулу билдирди.
Буга чейин РИА Новости агенттиги Кыргызстанда россиялык "Россия Культура", "Россия 24" жана "Звезда" телеканалдарынын эфири убактылуу токтотулганын жазган. Шилтемени жеке менчик "Акнет" кабелдик телеберүү провайдерине берген.
"Акнет" компаниясы расмий сайтына бир катар өлкөлөрдөгү мыйзамдык чектөөлөргө байланыштуу кечээ эл аралык спутниктен ВГТРКнын телеканалдарын көрсөтүү бир тараптуу блоктолгонун билдирүүдө.
Эфирден өчүрүү кыргыз операторлору тараптан болгон жок. Провайдерлер сигнал ала турган эл аралык спутникте көйгөй жаралууда.
"Сигналды туруктуу алуу үчүн резервдик эфир боюнча иш жүргүзүп жатабыз. Бул иштер соңуна чыгары менен телеканалдарды биздин линиядан көрүүгө жеткиликтүү болот", — деп айтылат провайдердин билдирүүсүндө.
Sputnik Кыргызстан кошумча маалымат алуу үчүн "Акнетке" кат түрүндө сурам жиберди.
Эсенгул уулу мындай мүчүлүштүк жеке менчик компаниялардын өзүндө болушу мүмкүндүгүн, мамлекеттин буга тиешеси жоктугун айтты.
"Кыргызстандын социалдык пакетинде каралган россиялык телеканалдар кадимки режимде көрсөтүлүп жатат. Эч кандай чектөө болгон жок. Коммерциялык негиздеги жеке менчик кабелдик провайдерлердин өзүндө техникалык маселе жаралышы мүмкүн", — деди министрдин орун басары.
Белгилей кетсек, социалдык пакеттеги телевидениелер Кыргызстан калкынын 100 пайызын камтыйт. Ал эми "Акнеттин" кабелдик телевидениесин Бишкек менен Ошто чакан аудитория гана акы төлөп көрөт.
Ал арада Борбор Азиянын башка мамлекеттеринде да жогорудагыдай көйгөй жаралганы кабарланууда.