БИШКЕК, 26-май — Sputnik. Кыргызстан менен Казакстандын өлкө башчылары Садыр Жапаров менен Касым-Жомарт Токаев Бишкектеги Аль-Фараби атындагы Казак улуттук университетинин филиалына барды. Бул тууралуу президенттин маалымат кызматы кабарлады.
Окуу жайдын ректору Жансейит Түймебаев мамлекет башчыларына имаратты кыдыртып, билим берүү мекемеси тууралуу айтып берген.
Филиалды ачуу чечими Садыр Жапаровдун 2021-жылдын март айында Казакстанга болгон мамлекеттик сапарынын жыйынтыгында кабыл алынган. Бир жылдын ичинде филиал лицензия алган.
"Студенттер бүгүнкү күндө Кыргызстанда жана чет өлкөлөрдө талап кылынган IT-технология, тоо-кен иштери, жаратылыш ресурстарын пайдалануу, туризм жана башка адистиктер боюнча билим алышат", — деп жазылган маалыматта.
Ага Казакстандагы башкы университеттин өзүнөн профессордук-окутуучулар курамынын 30 пайызы тартылса, окутуучулардын 70 пайызы Кыргызстандан болот деп пландалып жатат.
Келечекте жамааттык пайдалануу үчүн илимий лаборатория жана технопарк түзүү мерчемделүүдө.
Аль-Фараби атындагы Казак улуттук университетинин бул филиалынан эки өлкөнүн, ошондой эле башка мамлекеттердин жарандары окуй алышат.
Кыргызстан менен Казакстандын лидерлери окуу жайдын имаратын көрүп чыгып, университеттин Ардактуу меймандар китепчесине каалоо-тилектерин жазып калтырышты.