БИШКЕК, 24-май — Sputnik. Соңку окуялар Россия өзүнүн тышкы саясатын кайрадан талдап, постсоветтик мейкиндикке көбүрөөк ыкташы керектигинен кабар берет. Мындай пикирин Федерация кеңешинин төрагасынын орун басары Константин Косачев билдиргенин РИА Новости жазды.
Саясатчы "Россия сегодня" медиа-группасынын аянтчасында өткөн "Жаңы ойлор, жаңы реалдуулук" форумуна катышкан.
© Sputnik / Илья Питалев
/ "Биз чогуу түзгөн бирдиктүү Европадан оолактоого аргасыз болобуз. Россия постсоветтик мейкиндикке, КМШ өлкөлөрүнө, башкача айтканда, Россияга түз көз караштагы мамлекеттерге активдүүрөөк мамиле кылышы керек. Азыркы кырдаал Россиянын тышкы саясатынын концепциясын оңдоону талап кылат. Экономикага келсек, импортту алмаштыруу программасы толук ишке ашкан жок. Бутубузга туруш үчүн сабак алчу нерселер көп", — деди Косачев.
Ошондой эле ал толук кандуу экономикалык өнүгүүнү камсыздоо үчүн кайсы багыттарга басым жасалышы керектигине токтолду.
"Гуманитардык чөйрөдө биз өлкөбүздүн этникалык, административдик түзүлүшү боюнча өзгөчөлүгүн биринчи планга чыгарышыбыз кажет", — деди саясатчы.
Буга чейин Косачев дүйнө кандай болушу керек жана Россия анда кандай орунга ээ болот деген суроолорго жооп издеп жатканын айткан.
Анын айтымында, Батыш "кансыз согуштун" натыйжасын дайыма өз пайдасына чечүүнү көздөп келген. Качан гана жеңилип бара жатканын сезгенде тирешүүнү кайра баштоо чечимин кабыл алышат. Кандай болгон күндө да дүйнөнүн Батышка эч кандай шартсыз багынып берүүсү жөнүндө сөз болбошу керек. Ошондуктан акыркы жеңиш үчүн аягына чейин барууга туура келет.