БИШКЕК, 21-май — Sputnik. Президент Садыр Жапаров "Улуттук киноиндустрияны өнүктүрүү жана Кыргыз Республикасынын кинематографиясын мамлекеттик колдоо системасын мындан ары өркүндөтүү боюнча чаралар жөнүндө" жарлыкка кол койду. Бул тууралуу мамлекет башчынын маалымат кызматы билдирди.
Жапаров улуттук кинематографияны колдоо маданият чөйрөсүндөгү мамлекеттик саясаттын маанилүү милдеттеринин бири деп таанылсын деген тапшырма бергени жана бир нече багыттар белгиленгени кабарланды.
Улуттук кинематографияны өнүктүрүүнүн артыкчылыктуу багыттары төмөндөгүдөй деп белгиленген:
улуттук кинофильмдерди, сериалдарды, анимациялык фильмдерди өндүрүүнү финансылык камсыз кылуу;
рыноктук принциптердин негизинде улуттук кинематографияны мамлекеттин колдоо системасын өркүндөтүү, өлкөгө чет жактагы кинокомпанияларды тартуу жана биргелешкен кинофильмдерди, сериалдарды жана анимациялык фильмдерди өндүрүүнү өнүктүрүү;
экономиканын өзүнчө тармагы катары киноиндустрияны өнүктүрүү, заманбап жана жогорку технологиялык материалдык-техникалык базасы бар инфратүзүмдү калыптандыруу.
Ошондой эле төмөнкүлөрдү түзүү аныкталсын:
кинематография чөйрөсүнүн кадрларын даярдоонун, чыгармачыл ишмерлердин жана техникалык кызматкерлердин квалификациясын жогорулатуунун натыйжалуу системасын;
улуттук кинематографияны дүйнөлүк кинопроцесстерге интеграциялоо, кинопрокат системасын өнүктүрүү жана улуттук фильмдерди, сериалдарды жана анимациялык фильмдерди дүйнөлүк кино рынокто илгерилетүү үчүн шарттар.
Кинематография чөйрөсүнүн өкүлдөрүнүн төмөнкүлөр боюнча сунуштары колдоого алынсын:
2023-жылдан баштап ар жылдык негизде Бишкек эл аралык кинофестивалын уюштуруу жана өткөрүү;
жогорку билим берүү мекемелеринде "Кинематография" багыты боюнча окуп жаткан студенттерди колдоо максатында мамлекеттик стипендияны уюштуруу;
өлкөнүн инвестициялык шарттарын жакшыртуу үчүн Кинематография департаментинин түзүмүндө кинокомиссиянын иштөөсү;
өнүккөн киноиндустриясы бар өлкөлөрдүн кинематографисттери менен тажрыйба алмашуу жана кадрлардын квалификациясын жогорулатуу, даярдоо, окутуу;
кинематография чөйрөсүн динамикалуу өнүктүрүү үчүн жагымдуу экономикалык шарттарды түзүү.
Төмөнкүлөрдү түзүү максатка ылайыктуу деп эсептелсин:
Кинематография департаментинин алдындагы "Кыргыз сериал" чыгармачылык-өндүрүштүк бирикмеси" мамлекеттик мекемесин;
Кино фондун түзүү.
Жарлыкка камтылгандарды ишке ашыруу үчүн тийиштүү мамлекеттик органдарга укуктук ченемдерди иштеп чыгуу, каражат маселесин чечүү тапшырмалары берилгени айтылды.