БИШКЕК, 20-май — Sputnik. Евразия экономикалык биримдигинин аймагына көбүнчө акциздик товарларды мыйзамсыз алып кирүүгө аракет кылышат. Бул тууралуу Евразия экономикалык комиссиясынын (ЕЭК) бажы кызматташтык боюнча министри Максат Мамытканов билдирди.
Ал бүгүн Sputnik агенттигинин мультимедиалык маалымат борборунда "ЕАЭБдеги бажы кызматташтыгы жана навигациялык пломбаларды колдонуунун келечеги" аттуу видеокөпүрөгө катышты.
Евразия экономикалык комиссиясынын (ЕЭК) бажы кызматташтык боюнча министри Максат Мамытканов
© Sputnik / Владимир Трефилов
"Көбүнчө санкция салынган товарларды алып кирүүгө аракет кылышат. Тез арада пайда бере турган чылым, алкоголь, акциздик товарлар мыйзамсыз алып келинет. Бул боюнча күрөш жүрүп жатат, анын бирден-бир ыкмасы — товарларды маркалоо", — деди Мамытканов.
Ошондой эле ал биримдиктин бардык бажы органдары тарабынан экономикалык кылмыштарга каршы күрөшүү багытында бир катар иштер жасалып жатканын белгиледи. Мындай аракеттер кара ниет ишкерлерди көмүскөдөн чыгарып, мыйзамды аткарууга мажбурлоону көздөйт.