БИШКЕК, 18-май — Sputnik. Акыркы мезгилде Борбор Азия өлкөлөрү үчүн коркунучтар жана чакырыктар көбөйүп жатат. Бул тууралуу Коопсуздук боюнча эксперт, спецназдын ардагери Нурлан Досалиев Sputnik Кыргызстан радиосунун эфиринде айтты.
"Бүгүнкү күндө коопсуздук концепциясы көптөгөн чөйрөлөрдү камтыйт. Анын ичинде: чек ара, маалыматтык, санариптик жана соңку окуялардын негизинде биологиялык дагы. Бул коркунучтардын баарына комплекстүү каршы туруу зарыл, муну бир дагы Борбор Азия мамлекети жалгыз жасай албайт. СССР бир нече убакыт бою (1991-жылдан 1999-жылга чейин) Кыргызстандын чек арасын Россиянын чек ара тобу кайтарып, ал кеткенден кийин Жума Наманганинин согушкерлери Баткенге кол салышкан”, — деди Досалиев.
Анын айтымында, Тажикстандагы жарандык согуштан жана Баткен окуясынан кийин Борбор Азия мамлекеттери коопсуздук маселесин олуттуу ойлонушту.
"Андан кийин Жамааттык коопсуздук келишимине кол коюлду. Уюмга быйыл 30 жыл болду. Кийин ЖККУ түзүлүп, ага жүктөлгөн милдеттер аткарылып жатат. Азыркы шартта Батышка Борбор Азия хаос зонасы катары керек болуп турат. Андыктан ЖККУ мүчөлөрү өз ара иштешүүсүн күчөтүү зарыл", — деди эксперт.
Жамааттык коопсуздук жөнүндө келишим уюмуна Армения, Беларусь, Казакстан, Кыргызстан, Россия жана Тажикстан кирет.