БИШКЕК, 16-май — Sputnik. Эртең Бишкек калаасында СПИДден көз жумгандар эскерилип, оору менен күрөшүү жолдору талкууланат.
"СПИД" республикалык борборунун маалымат кызматы аталган иш-чарага ВИЧ менен жашап жүргөндөр, жарандык уюмдардын өкүлдөрү келерин билдирди.
Дүйнөлүк саламаттык сактоо уюмунун демилгеси менен жыл сайын майдын соңку жумасында ВИЧ/СПИДден көз жумгандар эл аралык масштабда эскерилип келет. Быйыл ал "БИЗ эстейбиз! БИЗ аракет кылабыз! ВИЧке караганда БИЗ көппүз!" деген ураан менен өтүп жатат.
"Күндүн темасы ВИЧ-инфекциянын бардык аспектисинин маанилүү экендигин түшүнүү ар бир адам, жалпы эле коомдун жашоосуна таасири бар экендигин көрсөтүп жатат. Бул ВИЧтин андан ары жайылышына каршы турууга даярдык көрүүгө жана аракет кылууга мүмкүнчүлүк берет. Бул өзүң жөнүндө ойлоо, өтүп кеткендерди эскерүү, учурда ВИЧ менен жашап жаткандарга түшүнүү менен кароо үчүн болгон нерселерди жасоого берилген мүмкүнчүлүк", — деп айтылган маалыматта.
Дүйнө статистикага таянсак, СПИД болгондон кийин келип чыккан башка оорулар кошул-ташыл болуп 32,7 миллион адам көз жумган.
Кыргызстанда 11 381 адам ВИЧ-инфекция жугузуп алган, алардын 10 732си кыргызстандыктар. Өлкөдө ооруну жыныстык жол менен жугузуп алгандар жалпы статистиканын жарымынан көбүн ээлейт, тагыраак айтканда — 53 пайыз (кумулятивдик жол). Ал эми былтыркы жылдын эсеби менен алганда мындай ыкма менен ооруп калгандар 82 пайызды түзгөн. Жаш курак боюнча алып караганда 25-45тегилер көп. Илдетке чалдыккан ар бир 10 адамдын алтоо — эркек.
"Бүгүнкү күндөгү башкы нерсе ВИЧ-инфекция боюнча ар бир адамдын өзүн профилактикалоосу — жарандардын өз ден соолугуна кам көрүү жаатындагы мамилесинин өзгөрүүсү. Антиретровирустук терапия эгерде ВИЧ-инфекция менен жүргөн адам дарыгерлердин айткандарын аткарып жана коопсуз жашоо тартибинен чыкпаса, анын жашоосун кадыресе түрдө улантууга шарт түзүп берет. Аталган вирусту өз учурунда аныктап калса кадимкидей эле жашоо коштойт, ал киши иштейт, үй-бүлө курат, ден соолугу чың бала төрөйт", — деп айтылган "СПИД" тараткан маалыматта.
Эскерүүнүн 17-майда саат 11:00-13:00дө Орозбеков көчөсү, 51 дарегинде өтө турганы айтылды.