БИШКЕК, 14-май — Sputnik. Москванын антироссиялык санкцияларга каршы чаралары долларды эл аралык финансы системасындагы ээлеген ордунан козголтуп койду дейт "Хуаньцю шибао" басылмасы үчүн жазган макаласында эксперт Гао Дэшен.
Адистин айтымында, Россиянын башка өлкөлөр менен рубль аркылуу эсептешүүнү жайылтуу чечими АКШ үчүн кооптуу кадам болуп калган.
"Россиянын тышкы карызды рубль менен жаап, аны "кастарын тиккен мамлекеттерге" энергетикалык ресурс сатууда эсептешчү валюта катары пайдалануусу доллардын соода жана финансы системасындагы монополдук абалына доо кетирди. Аалам тездик менен доллардан кийинки доорго өтүүдө", — деп жазган Гао Дэшен.
Макалада Москва кабыл алган чаралар АКШ менен Батыштын санкциялык саясатынын алсыздыгын айгинелеп турганы белгиленди.
Украинаны демилитаризациялоо жана денацификациялоо боюнча атайын операция башталган соң батыш мамлекеттери Москвага карата санкциялык кысымын күчөткөн. Европада россиялык энергоресурстардан көз карандылыкты азайтуу тууралуу айтылып, өлкөдөн бир катар бренддер чыгып кеткен. АКШ, Евробиримдик, Канада жана башка өлкөлөр россиялык учактар үчүн асманын жапкан болчу.
Кремль мындай кадамдарды буга чейин болуп көрбөгөндөй катаал экономикалык согуш деп атады. РФ президенти Владимир Путин санкциялар дүйнө экономикасына сокку болгонун белгилеп, Батыштын башкы максаты миллиондогон кишини жакырлантуу экенин эскерткен. Анын айтымында, учурдагы окуялар Батыштын саясаттагы да, экономикадагы да үстөмдүгүнө чекит коёт.