Кагылыш 9-майда эртең менен башталган. Өлкөдөгү экономикалык кризис менен өкмөт башчы Махинда Раджапаксанын отставкасынын фонунда Шри-Ланканы ээнбаштыктын, бейбаштыктын толкуну каптады. Миңдеген кишилердин көчөгө чыгып, отставканы майрамдамак болгон аракети башаламандыкка айланып кетти. Анын катышуучулары аткаминерлерге кол салып, башкаруучу партиянын мүчөлөрүнө жана алардын туугандарына тиешелүү үйлөр менен дүкөндөрдү өрттөштү. Полициянын маалыматына караганда, башаламандыктан жети киши каза таап, 230дан ашыгы жарадар болгон.
Кагылыштын катышуучуларын кууп-таратуу үчүн полиция суу менен атып, көздөн жаш агызуучу газ колдонду. Өлкөдө белгисиз мөөнөткө чейин коменданттык саат киргизилип, армия менен полицияга ашыкча укук берилди. Тартипти сактоо үчүн армия да тартылды. Аскерлер көчөдө мародерчулук кылгандарды же коомдук мүлктү жок кылып жаткандарды көрсө, дароо ок чыгарууга буйрук алды. Президент Готабая Раджапакса элди тынчтанууга, өч алуу үчүн жасалган зомбулук иштерди токтотууга чакырды.