ИИМдин Кылмыш иликтөө башкы башкармалыгынын кызматкерлери адам уурдоого тиешеси бар деген кылмыштуу топтун мүчөлөрүн кармады. Бул тууралуу атайын органдын маалымат кызматы кабарлады.
Билдирмеге караганда, ушул жылдын май айынын башында бир нече эркек киши 28 жаштагы адамды күч колдонуп автоунаага отургузуп, шаардын четине алып барышкан. Алар жабыркаган адамдан акча талап кылып, ишкердин 50 000 сомун тартып алышкан. Кийинчерээк калган акчаны бересиң деген шарт менен аны бошотушкан.
Аталган факт Кылмыш-жаза кодексинин 165-беренеси ("Адам уурдоо") боюнча Бирдиктүү реестрге катталган.
Кылмышка шектелген төрт киши: Ысык-Көл облусунун 27 жаштагы, А.А. аттуу тургуну, Чүй облусунун 27 жаштагы О.М. аттуу жашоочусу, Талас облусунун 19 жаштагы Ш.Ж. аттуу тургуну жана Нарын облусунун жашоочусу 4-май күнү колго түшүрүлгөн. Бардыгы Бишкек шаарында жашаганы маалым болду.
"Ысык-Көл жана Чүй облустарынын тургундары уюшкан кылмыштуу топтун мүчөсү катары ИИМдин каттоосунда турат. Алардын автоунаасын текшерүү учурунда травматикалык тапанча, үч бычак жана ар кандай үлгүдөгү төрт автоунаанын техпаспорттору табылган", — деп айтылат маалыматта.
Аталган иш боюнча тергөө иштери уланып жатканы айтылды.