БИШКЕК, 10-май — Sputnik. Rutube видеохостинги ири чабуулга туш болду. Бул тууралуу маалымат расмий Telegram-каналга жарыяланды.
Адистердин айтымында, хакерлер 9-майга караган түнү сайтты талкалоого аракет жасаган.
"Россиялык ведомстволордун сайтынан кийин хакерлердин колу Rutube хостингине жетип, киберчабуул жүрүп жатат. Учурда платформага кирүү мүмкүн эмес", — деп жазды "Rutube вещает" Telegram каналы.
Адистер билдиргендей, окуя көзөмөлгө алынганы менен видеохостинг азырынча ишке кире элек. Учурда калыбына келтирүү иштери аткарылып жатат.
"Акыркы күндөрү хакерлер Rutube порталын иштен чыгарууга абдан аракет жасап жатышат. 23-февралдан бери ондогон DDoS-чабуул катталды. Бүгүнкүсү өзгөчө катуу болду. Учурда сервисти калыбына келтирүү иштери аткарылып, адистер кесепеттерди жоюп жатышат. Биз колдонуучулардын маалыматтарынын коопсуздугуна чоң маани берип келебиз, алар жабыркаган жок", — деди Rutube порталынын башкы директору Александр Моисеев.
Техникалык адистер үчүнчү жактар видеоархивге кире албай турганын тастыктады.