БИШКЕК, 10-май — Sputnik. Мамлекеттик жогорку окуу жайлардын ректорлорун дайындоо укугун билим берүү жана илим министрине берүү сунушталды. Бул туурасында министр Алмазбек Бейшеналиев "Билим берүү жөнүндөгү" жаңы мыйзам долбоорунда камтылганын билдирди.
Анын айтымында, учурда улуттук статусу бар төрт университеттин ректорун президент дайындайт. Калган 29 мамлекеттик ЖОЖдун жетекчилерин кызматка коюу укугун министрге берүү зарыл. Азыркы тапта алар эмгек жамааты тарабынан беш жылдык мөөнөткө шайланат.
"Ректорлорду шайлоо жолу менен кызматка алып келүүнүн тобокелчиликтерин 10 жылдык тажрыйбада көрдүк. Бир топ кемчиликтери аныкталды. Окуу жайларда билим берүүгө караганда саясий процесс көбөйүп кетти. Биздин негизги максатыбыз — билим берүү тармагын саясаттан оолак кармоо. Бул мыйзам күчүнө кирсе массалык түрдө кызматтан кетишпейт, ар бир жетекчи өз мөөнөтү бүткөнчө иштейт", — деди Бейшеналиев.
Депутат Айбек Маткеримов министрдин эч ким менен кеңешпей эле ректорлорду дайындоосун туура эмес деп эсептейт. Андыктан Жогорку Кеңештин Социалдык саясат комитети менен макулдашып, анан кызматка коюуну сунуштады.
Дагы бир эл өкүлү Кундузбек Сулайманов ректорлорду кызматтан кетирүү укугун парламентке берүү керектигин айтты.