Мамлекеттик кызматкердин этикасын эгемендүү өлкөдө кайрадан түзүп чыгып, ага улуттук колоритти кошуу зарыл. Мындай пикирин Советбек Байгазиев Sputnik Кыргызстан радиосунда маек куруп жатып билдирди.
Анын айтымында, "Манас" эпосунда мамлекеттик кызматкердин жүрүм-туруму кандай болушу керектиги кенен сүрөттөлгөн.
"Мамлекеттик кызматкерлердин этикасы боюнча кайрадан иштер жасалышы зарыл болуп турат. Аны түзүп, саясий кызматкерлерди өзүнчө милдеттендирип жана аны талап кылуу жолдорун иштеп чыгуу зарыл. Аны түзүүдө улуттук колоритти кошушубуз керек. "Манас" эпосунда бул абдан жакшы көрсөтүлгөн. Мисалы, Манас баатыр жигиттерден өзүнө чоро тандоодо өтө жогору критерийлерди койгон. Бакай атанын акылга муюган сөздөрү эле эмнени туюндуруп турат. Эпостогу мына ушул мамлекеттик башкаруу этикасынан азыркы күнгө үлгү алуубуз шарт", — деди Байгазиев.
Профессор бул жаатта мамлекет тарабынан колго алынган ырааттуу иштер жүрүшү зарылдыгын кошумчалады.