БИШКЕК, 9-май — Sputnik. Европа биримдиги өз санкцияларынан айланып өтүүнүн жолун тапты. Бул жаатта ага Греция жардам берет. Бул тууралуу "Sputnik Ближнее зарубежье" телеграм-каналы Die Welt басылмасына таянып жазды.
Маалым болгондой, Россиянын нефтиси Европа портторуна Грециянын танкер флотунун жардамы менен жеткирилип турмакчы. Өлкө Россиянын кара алтынын ташуу боюнча өз үлүшүн үч эсеге көбөйткөн.
"Мындан улам Европа мамлекеттери нефтиси жок калбайт. Бирок ага өтө көп каражат төлөө керек болуп калат", — деп айтылат маалыматта.
Россия 24-февралда Украинага карата атайын операцияны баштаган соң ага жооп катары Батыш өлкөлөрү Москвага катар-катар санкцияларды салган. Алар биринчи иретте банк секторуна жана жогорку технологиялуу продукцияларга кесепетин тийгизиши керек дешкен. Кремль аны буга чейин болуп көрбөгөндөй экономикалык согуш деп атады. Бийлик мындай сценарийге мурдатан эле даярдангандыгын айтып, социалдык милдеттенмелер аткарыла берерине ишендирди.
Европа күйүүчү майдын кымбатташына жана андан улам пайда болгон азык-түлүк инфляциясына кабылды. Мындай жагдай Европа биримдигиндеги көптөгөн жарандардын нааразылыгын жаратууда.