БИШКЕК, 8-май — Sputnik. Верона шаарынын жашоочулары НАТОго жана альянстын Украина каатчылыгына кийлигишип жатканына каршы жүрүшкө чыкты. Бул тууралуу жергиликтүү Verona Sera басылмасы жазды.
Митингчилердин видеосун "Sputnik Ближнее зарубежье" телеграм-каналы жарыялады.
Шаар тургундарын "Веронанын эркиндик комитети" кыймылы чогулткан. Жүрүштүн катышуучулары "НАТО... Чагымчылдык жасоо үчүн түзүлгөн" деп жазылган плакаттарды көтөрүп алышкан. Марштын уюштуруучулары Украинада болуп жаткан окуялар бир тараптуу чагылдырылып жатканын айтып, бул кыймылдын өз оюн айттырууга мажбурлаганын белгилеген.
"Бир нече жумадан бери биз Украинадагы чыр-чатакка байланыштуу так позицияны ээлей элек болчубуз. Аны НАТОнун жетекчилиги алдында Батыштын күчтөрү уюштуруп, колдоп, жүргүзүүдө. НАТО украина калкына сокку уруп, ага өкмөтү баш ийип берүүдө. Дал ушул себептен биз жөн отура алган жокпуз", — деди митингдин уюштуруучулары.
"Веронанын эркиндик комитети" Россия элчилигине ачык кат жөнөтүп, анда Италиянын Украинага курал жеткирүү боюнча чечимине макул эместигин билдиришкен. Бир нече күн мурда Италиянын премьер-министри Мари Драги Рим Киевге көрсөткөн жардамынын көлөмүн 800 миллион еврого чейин көбөйтөрүн айткан. Ал тургай украиналык качкындарды колдоо максатында 500 миллион евро бөлгөн. Украинага жеткирген курал-жарактын көлөмү жана так параметрлери айтылган эмес.