БИШКЕК, 7-май — Sputnik. ЖК төрагасы Талант Мамытов 9-Май — Жеңиш майрамын утурлай Бишкек шаарында жашаган Улуу Ата Мекендик согуштун ардагерлери Туркөнакун Бейшембаев менен Василий Пухаревдун үйүнө барып куттуктады. Бул тууралуу парламенттин маалымат кызматы кабарлады.
Мамытов аларга согуш учурунда көрсөткөн каармандыктары үчүн ыраазычылыгын билдирген.
"Биз азыркы тынч турмушту тартуулаган ардагерлерибиздин эрдигин эч качан унутпайбыз. Анткени Улуу Жеңиш майрамы каармандыктын жана тайманбастыктын үлгүсү катары тарых бетинде түбөлүккө кала берет. Айрыкча, көп улуттуу мамлекетибиздин бүтүндүгү, тынчтыгы үчүн күрөшүп, кан күйгөн согушта каармандык көрсөткөн сиздердей аталарыбыздын баскан жолу баарыбызга өрнөк", — деген Мамытов.
Ошондой эле Мамытов согуш ардагерлерине төраганын резервдик фондунан 30 миң сомдон акчалай жардам көрсөтүп, азык-түлүк баштыктарын тапшырган.
Ардагерлер өз кезегинде төрагага ыраазычылыгын билдирип, акыл-насааттарын айтуу менен бардык кыргызстандыктарга тынчтык, ынтымак жана биримдик каалаган.
98 жаштагы Туркөнакун Бейшембаев согуш жылдары Украина, Беларусь, Венгрия, Молдавия, Чехословакия аймактарындагы кан күйгөн апаатка катышкан. Көрсөткөн эрдиги үчүн Ата Мекендик согуштун II даражадагы ордени баштаган бир катар сыйлыкка татыган. Согуштан кийин да жооптуу кызматтарда иштеп, өлкөнүн өнүгүүсү үчүн зор эмгек жумшаган.
Ал эми 99 жаштаган Василий Пухарев майданда аткычтар полкунда кызмат өтөгөн. Согуштагы каармандыгы үчүн бир катар орден жана медалдарга ээ болгон.