БИШКЕК, 7-май — Sputnik. Республикадагы ички каттамдар калыбына келтирилип, бардык аэропорттор ишке киргизилет. Бул тууралуу президент Садыр Жапаров Ысык-Көл облусундагы жумушчу сапарында билдирди.
Өлкө башчы бүгүн, 7-майда, Каракол эл аралык аэропортунун жаңы аэровокзалынын курулушуна капсула салды.
"2026-жылга чейин Кыргызстанды өнүктүрүүнүн улуттук программасында аэропорттордун инфраструктурасын жакшыртуу чечимин кабыл алган элем. Ага "Ысык-Көл", "Каракол", "Нарын", "Ош", "Жалал-Абад" жана "Баткен" аэропорттору киргизилген. Буюрса, республикадагы ички каттамдар калыбына келтирилип, бардык аэропорттор, анын ичинде Казарман, Талас жана башка аэропорттор колдонууга берилет. Бул чыгашалар "Манас" аэропортунун таза кирешесинин эсебинен жабылат. Былтыр ал жакта коррупцияны жоюп, таза киреше төрт миллиард сомду түздү. Буга чейин эки миллиард сомдун тегерегинде болчу", — деди Жапаров.
Ал ошондой эле эл аралык аэропортторду ар тараптан өнүктүрүү, колдоо мамлекеттин артыкчылыктуу багыттарынын бири экендигин айтты.
"Элибиз үчүн бир облустан экинчи облуска тез жана ыңгайлуу каттоосуна мүмкүнчүлүк түзүлөт. Үйүнө конок келсе, кут келди деп, ар дайым жылуу маанайда тосуп алган ата-бабаларыбыздын салтын сактап, биз баарыбыз жапа тырмак киришип, биргелешип аракет менен туризм тармагын жолго коюшубуз зарыл. Бул тармакты эл аралык стандарттарга жеткирип, өзүбүздүн меймандостук салтыбыз менен жуурулуштуруп алсак, өлкөнүн өнүгүшүнө чоң салым кошоруна мен бекем ишенем", — деп кошумчалады президент.
Каракол эл аралык аэропортундагы курулуш иштери соңуна чыкканда саатына 250 жүргүнчү кабыл алып, "Embraer 190" үлгүсүндөгү жана ага окшош учактарды кабыл ала алат. Ал үчүн 2400 метр узундуктагы учуу-конуу тилкеси салынат.
Буга чейин министрлер кабинетинин төрагасы Акылбек Жапаров Баткен облусундагы эки аэропортко эл аралык статус бериле тургандыгын да кабарлаган.