БИШКЕК, 3-май — Sputnik. Кыргызстандык музыкант Викрам Рузахуновдун Казакстанда кыйноого кабылышына байланышкан иликтөө иши токтотулду. Бул тууралуу Sputnik Кыргызстан агенттигинин кабарчысына музыканттын адвокаты билдирди.
Алматыда Рузахуновдун кызыкчылыгын адвокаттар Рена Керимова жана Елена Жигаленок коргоп жатат.
"Рузахунов бул жакка келип көрсөтмө берүүдөн баш тартууда, анткени чагымчылыкка кабылуудан, ошондой эле өмүрү менен ден соолугунан кооптонот. Биздин укук коргоо органдарына бул жагдай майдай эле жакты, анткени жабырлануучу өзү катышпаса иликтөөнү толук жүргүзүүгө мүмкүн эмес да. Апрель айында сырттан сурак уюштуруу боюнча арыз жазып, ыкчам тергөө тобунун мүчөлөрүнүн бири Бишкекке барып Викрамдан көрсөтмө алуусун сурандым, бирок макул болбой коюшту", — деген Керимова orda.kz. басылмасына.
Маалыматка ылайык, жабырлануучу тараптан эч кандай көрсөтмө болбогондуктан аталган иш боюнча тергөө убактылуу токтотулган. Бирок шектүүлөрдүн өздүгү жана кылмыштын бардык жагдайлары такталууда.
"Учурда Казакстандын Башкы прокуратурасы кыргыз кесиптештери менен сүйлөшүп, Рузахуновдун Алматыга барып тергөө ишине катышуусун уюштуруу боюнча макулдашып жатышат. Бул жактан ага кайтаруу жана коргоо кепилдиги берилет, ошентсе да ал кооптонуп жатат", — деди адвокат.
Кыргызстандык музыканттын кармалышы
Казакстандын Qazaqstan мамлекеттик телеканалы 9-январда митингдерге катышуу үчүн Кыргызстандан барды делген жарандын сурак берип жаткан видеосун жарыялаган. Ал белгисиз адамдар митингдерге катышуу үчүн 90 миң теңге сунуштап чакырып, самолётко билетин алып берип, батирге жайгаштырганын билдирген.
Көп өтпөй Кыргызстандын ИИМи аталган жаран музыкант Викрам Рузахунов экенин аныктап, анын Алматыга концерт койгону барганын маалымдады.
Ошол эле учурда кыргызстандыктар музыкантты террорчу катары көрсөткөнүнө нааразы болуп, аны бошотуу талабы менен Казакстандын Бишкектеги элчилигинин алдына митингге чыккан. Алар менен УКМК төрагасы Камчыбек Ташиев жолугуп, мекендештин укугу корголорун убадалаган.
Кийинчерээк ТИМ Рузахуновду бошотуу талабы менен Казакстанга нота тапшырган.
Андан кийин Казакстандын мамлекеттик телеканалдары Рузахуновго байланышкан видеолорун өчүргөн.
Ал арада Юстиция министрлиги кыргыз жаранынын кыйноого кабылганын болжоп, Казакстандын күч түзүмдөрүнө кылмыш ишин козгоону Башкы прокуратурага демилгелеген.