Мектеп окуучуларынын предметтик олимпиадасын жеңген окуучунун мугалими 10 миң сом өлчөмүндө бир окуу жылына ай сайын кошумча акы алат. Бул тууралуу Гүлнура Токтахунова Sputnik Кыргызстан радиосунда маек куруп жатып билдирди.
Анын айтымында, окуучу республикалык сынакта 2-орунду ээлесе мугалими 5 миң сом, 3-орунду алса айына 3 миң сом берилет.
"Мектеп окуучуларынын предметтик олимпиадасын жеңген окуучунун мугалими 10 миң сом өлчөмүндө бир окуу жылына ай сайын кошумча акы алат. Мындай токтом биринчи жолу кабыл алынып жатат. Бул мугалимдин эмгегин баалап, кадырын көтөрүү үчүн жасалууда. Анткени педагогдун изденүүсү, окуучуга мамилеси да өзгөрөт. Мугалим баланы алгач шаардык/райондук, облустук, республикалык деңгээлдеги олимпиадага жеткирүү үчүн көп убактысын, эмгегин короткондуктан анын мээнети убагында мамлекет тарабынан колдоого алынышы зарыл. Мындан тышкары, окуучу республикалык сынакта 2-орунду ээлесе, мугалими 5 миң сом алат, 3-орунду багындырса айына 3 миң сом берилет", — деди Токтахунова.
Ошондой эле адис мектеп окуучусу предметтер аралык эл аралык олимпиаданы жеңип алса, анын мугалими бир жолу бериле турчу 500 миң сом сый акы аларын кошумчалады.