БИШКЕК, 1-май — Sputnik. Россия-Кыргыз өнүктүрүү фонду (РКӨФ) мөмө-жемиш жана жашылча кластерин түзүүгө 4 миллион доллардан ашык каражат бөлөт. Бул тууралуу фонддун маалымат кызматы билдирди.
Кечээ күнү РКӨФ менен "Кыргызцентрпродукт" ЖЧКсы мөмө-жемиштерди жана жашылчаларды тоңдурган цех ачууга каржы бөлүү тууралуу келишимге кол коюшкан.
Компания айыл чарба продукциясын сатып алуу, кайра иштетүү жана ондон ашык өлкөнүн соода борборлору менен консерва жасаган заводдоруна экспорттоо менен алектенет. 2016-жылы компания РКӨФтүн жардамы менен Чүй облусуна логистикалык борбор, ал эми 2021-жылы ошол эле жерде фонддун льготалык каражатынын эсебинен кургатылган мөмө жана жашылча жемиштердин өнөр жайы ачылган.
Жаңы долбоорго ылайык, логистикалык борбордун базасында мөмө-жемиш менен жашылчаны тез тоңдурган технология (IQF) менен иштеген цех ачылат. Бул мындай технологияны колдонгон Кыргызстандагы жалгыз ишкана болмокчу.
Цех жылына 1 800 тонна мөмө-жемиш менен 3 600 тонна жашылча жемиш өндүрөт.
РКӨФ төрагасы Артём Новиковдун айтымында, продукциянын 60 пайызы Россия менен Казакстанга экспорттолуп, жалпы көлөмү 1 миллиард сомду түзөт.
“Долбоордун арты менен жумушчу орундар түзүлөт. Айыл чарба продукциясын 500гө жакын фермер жеткирет. Натыйжада мөмө-жемиш жана жашылча кластери түзүлөт”, — деди ал.
Новиков кластердик өнүктүрүү жана экспорттук потенциалды жогорулатуу – бул РКӨФ колдогон багыттар экенин кошумчалады.