БИШКЕК, 27-апр. — Sputnik. Айыл чарба министри Жаныбек Аскаров өзүнүн коррупциялык ишине депутаттарды күнөөлөп жатат. Бул туурасында эл өкүлү Элвира Сурабалдиева парламентте билдирди.
Анын айтымында, министр элди депутаттарга каршы тукуруп, кол алдындагы адамдарды митингге чыгарууда.
"Айыл чарба иштерин депутаттар кечиктирип жатат деп күнөөлөбөсүн. Президент бир жыл мурун баштаган долбоорду 20 күн калганда өзүнүн жакын достору, жакындарынан түзгөн тизмени парламентке алып келгени уят. Аны биз жокко чыгардык. Анан депутаттар күнөөлүү деп бизди өзүнүн корруциялык иштерине аралаштырбасын. Жазгы талаа иштерине залакасын тийгизген министр өзү. Сурабалдиева күнөөлүү деп өзүнүн күнөөсүн башкага оодарбасын. Эртең арзан кредитке жетпеген фермерлердин тизмесин астына чыгарып берсем уят болуп калат", — деди Сурабалдиева.
Мындан улам ал УКМК төрагасы Камчыбек Ташиевге кайрылып, эмнеге митинг уюштуруп жатышканын карап коюуну суранды.
Өз кезегинде айыл чарба министринин орун басары Нурлан Шерипов министрликтин митингге тиешеси жоктугун айтты. Ал эми арзан кредит бериле турган фермерлер боюнча учурда депутаттар менен биргеликте комиссия иштеп жатканын белгиледи.
Депутат мында деле өзүлөрүнө тиешелүү компаниялар кошулуп жатканын билдирди.
"Ал тизмеге "Бахус ЛТД" деген аффилирленген компания кирген. Ал эч нерсеси жок компания экен, жөн эле акчанын изи жашыруу. Баары ачыкка чыккандан кийин абийириңиздерди жабам деп депутаттарды күнөөлөбөңүздөр, уят болот", — деди Сурабалдиева.
Ошондой эле ал президенттин сөзү менен иши дал келиши үчүн УКМК менен прокуратураны бул масаелени текшерүүгө чакырды.