Кыргызстанда 78 миң мугалим бар. 40 жаштан 70 жашка чейинки курактагы мугалимдердин көбү пенсия курагында. Бул тууралуу Гүлнура Токтахунова Sputnik Кыргызстан радиосунда маек куруп жатып билдирди.
Анын айтымында, жогорку билими бар жаран педагогикалык квалификациясын жогорулатып, мектепте сабак бере алат.
"Кыргызстанда 78 миң мугалимдин 70 пайызы пенсия курагына жакындап калды. Акыркы учурларда жогорку окуу жайларында педагогикалык билим алууну каалаган жаштардын саны кескин төмөндөп кеткен. Анткени эмгек акынын аздыгынан жаштардын көбү мугалим болууну каалабай, башка тармактарга кетип жатат. Президенттин жарлыгы менен жакында педагогикалык кызматкерлердин айлыгы 80 пайызга көтөрүлдү. Бул кадам атаандаштыкты күчөтүп, билим берүүнүн сапатына оң таасирин берет. Албетте, системаны жолго салуу үчүн комплекстүү иштер жасалып, туура чечимдер керек. Өзүбүздүн баалуулуктарды, дүйнөлүк тенденцияларды эске алып, татыктуу билим берүү зарыл болуп турат", — деди Токтахунова.
Ошондой эле адис билим берүү тармагында иштеген административдик кызматкерлердин эмгек акысы 50 пайызга жогорулагандыгын кошумчалады.